Stellingwarver kienderboekeweke uut aende in Noordwoolde

Noordwoolde - Op woensdagmiddag 30 september gaot in de biebeltheek van Noordwoolde de Stellingwarver kienderboekeweke uut aende. Die weke is mitien de dadde aktiviteit in de riegel van negen Stellingwarver boekeweken. Tiedens de middag zal d’r deur drie vri’jwilligers van de Stellingwarver Schrieversronte veurlezen wodden an verschillende leeftiedsgroepen.

Ni’je podcast mit verhaelen over Piepmoes

Extra andacht is d’r die middag veur de ni’je podcast mit verhaelen over Piepmoes en zien kammeraoden, schreven deur Sietske Bloemhoff. Femmie van Veen las veur de podcast 21 verhaelen in, en sund kot is die o.e. te vienen op ’e websteden www.stellingplus.nl, www.kienderwebstee.nl en www.stellingwerf-heemkunde.nl. Tiedens de eupeningsmiddag zal Femmie ok een tal verhaelen veurlezen.

Daor klept de klokke weer

Omreden et thema van de kienderboekweke geschiedenis is, zal in die weke op een speciaol inrichte taofel mit Stellingwarver kienderboeken ok de film ‘Daor klept de klokke weer’ deurlopend te zien wezen. Disse film wodde een peer jaor leden opneumen en vertelt over de geschiedenis van Stellingwarf rond 1500.

Speciaol anbod

Tiedens de kienderboekeweke gelt een speciaol anbod van kienderboeken. Die aktie gelt in de biebeltheek van Noordwoolde en bi’j de Stellingwarver Schrieversronte in Berkoop (bestellen via info@stellingwarfs.nl). Wie veur € 15,- de kienderboeken ‘In de bos van Piepmoes’, ‘De hollebomebos’ en ‘Pimmegien is groot’ kocht, krigt et boek ‘Daor klept de klokke weer d’r ommenocht bi’j.

De Stellingwarver Boekeweken, die in de plak kommen binnen veur de sutelaktie, gong op 11 september uut aende mit et verschienen van et boek ‘Uit de geschiedenis van Wateren, Zorgvlied en Oude Willem. De aktieweken wo’n in et weekaende van 8 en 9 november ofsleuten.